PF Balance: பி.எப். பேலன்ஸ் எவ்வளவு என தெரிந்துகொள்வது எப்படி?

தொழிலாளர் வைப்பு நிதியில் இருக்கும் தொகையை பலரும் அடிக்கடி சோதிப்பதில்லை. அதைச் செய்ய மூன்று வழிகள் இருப்பதுடன அவை மிகவும் எளிதாக உள்ளன.

தொழிலாளர்களுக்கு அவர்கள் வேலை பார்க்கும் நிறுவனங்கள் இ.பி.எப். ( EPF) எனப்படும் தொழிலாளர் வைப்பு நிதியை ( Employee Provident fund) வழங்கும். பொதுவாக இது மாதம் தோறும் சம்பளத்தில் பிடித்தம் செய்யப்பட்டு, அவரது பி.எப். கணக்கில் டெபாசிட் செய்யப்படுகிறது.

சம்பளத்தில் ரூ.1000 பிடித்தம் செய்யப்பட்டால் அதே அளவு பணத்தை நிறுவனத்தின் உரிமையாளரும் டெபாசிட் செய்ய வேண்டும். இவ்வாறு சிறுகச்சிறுக சேமிக்கப்பட்ட நிதி அந்த தொழிலாளருக்கு ஓய்வூதிய நிதியாகக் கிடைக்கும்.

இந்த வைப்பு நிதி அல்லது பி.எப். கணக்கில் எவ்வளவு உள்ளது என்பதை தெரிந்து கொள்ள என்ன செய்யலாம் என்று பார்க்கலாம். இதற்கு மூன்று எளிய வழிகள் உள்ளன.



பொதுக் கணக்கு எண்

இதற்கு யு.ஏ.என் ( UAN) அல்லது யுனிவர்சல் அக்கவுண்ட் நம்பர் ( Universal Account Number) எனப்படும் பொதுக் கணக்கு எண்ணை ஆக்டிவேட் (Activate) செய்ய வேண்டும். யு.ஏ.என். ஆக்டிவேட் ஆக குறைந்தது 6 மணி நேரம் ஆகும் என்பதால் அதுவரை காத்திருக்க வேண்டும். அப்போதுதான் பி.எப். கணக்கைப் பார்க்கும் வசதி கிடைக்கும்.

இணையதளம் வழியாக

பின், https://passbook.epfindia.gov.in/MemberPassBook/Login.jsp என்ற பக்கத்திற்குச் செல்லவும். அதில், யு.ஏ.என். மற்றும் பாஸ்வேர்ட் மற்றும் பாதுகாப்பு குறியீட்டுச் சொல் (Captcha) ஆகியவற்றை உரிய இடத்தில் டைப் செய்து Log In பட்டனை கிளிக் செய்யலாம்.

இப்போது பி.எப். கணக்கு திறந்து விடும். அதில் இடது கை பக்கத்தில் இருக்கும் 'Select MEMBER ID to View PassBook' என்பதை கிளிக் செய்தால் பி.எப். கணக்கின் பாஸ்புக்கை தோன்றும். அதை கிளிக் செய்தால் பி.எப். கணக்கில் இதுவரை எவ்வளவு பணம் சேர்ந்துள்ளது என அறிந்துகொள்ளலாம். (சிலருக்கு இந்த இடத்தில் ஒன்றுக்கு மேற்பட்ட பாஸ்புக் இருக்கலாம். அதில் ஏதாவது ஒன்றில் மொத்த தொகை காட்டப்படும். பெரும்பாலும் அது சமீபத்தில் டெபாசிட் செய்யப்பட்ட பாஸ்புக்காக இருக்கும்.)

எஸ்.எம்.எஸ். வாயிலாக

ஆன்லைன் முறையைப் போலவே இதற்கும் யு.ஏ.என். ஆக்டிவேட் செய்வது கட்டாயம். பின், பி.எப் கணக்குடன் பதிவு செய்யப்பட்ட மொபைல் எண் மூலம் EPFOHO UAN என 7738299899 என்ற எண்ணுகு எஸ்.எம்.எஸ். அனுப்ப வேண்டும்.

இதற்கு பதிலாக வரும் எஸ்.எம்.எஸ்.ஸில் பி.எப். கணக்கில் உள்ள இருப்பத்தொகை எவ்வளவு என்ற விவரம் இருக்கும். இது ஆங்கிலத்தில் இருக்கும். தமிழில் வேண்டும் என்றால், EPFOHO UAN TAM என அனுப்ப வேண்டும். மேலும், வங்காளம், குஜராத்தி, இந்தி, கன்னடம், மலையாளம், மராத்தி, பஞ்சாபி, தெலுங்கு ஆகிய மொழிகளும் பெறும் வசதி உள்ளது. அதற்கு தமிழுக்கு அனுப்பவதைப் போலவே முதல் 3 எழுத்துக்களைச் சேர்த்து அனுப்பவேண்டும்.

மிஸ்டு கால் மூலம்

இதற்கும் யு.ஏ.என். ஆக்டிவேட் செய்திருக்க வேண்டியது முதல் தேவை. மேலும் யு.ஏ.என். உடன் வங்கிக் கணக்கு எண், ஆதார் எண், பான் கார்டு எண் ஆகியவையும் இணைக்கப்பட்டிருக்க வேண்டும்.

பின், எஸ்.எம்.எஸ். முறையில் செய்தது போலவே, பதிவு செய்யப்பட்ட எண் மூலம் +911122901406 என்ற எண்ணுக்கு மிஸ்டுகால் கொடுக்க வேண்டும்.

அந்த கால் தானாகவே துண்டிக்கப்பட்டுவிடும். பின் பி.எப். இருப்புத்துறை விவரம் எஸ்.எம்.எஸ் மூலமாக கிடைக்கும்.