பள்ளி விடுதிகளில் சேர விண்ணப்பிக்க வேண்டுகோள்

நாமக்கல் மாவட்டத்தில் உள்ள ஆதிதிராவிடர், பழங்குடியினர் பள்ளி விடுதிகளில் சேர வரும் 19- ஆம் தேதிக்குள் விண்ணப்பிக்க வேண்டும் என அறிவிக்கப்பட்டுள்ளது.

இதுகுறித்து மாவட்ட ஆட்சியர் வி.தட்சிணாமூர்த்தி வெளியிட்ட செய்திக்குறிப்பு:

2016-17-ஆம் கல்வியாண்டில் நாமக்கல் மாவட்டத்தில் உள்ள ஆதிதிராவிடர், பழங்குடியினர் விடுதிகளில் சேர தகுதி உள்ள மாணவ - மாணவியரிடம் இருந்து விண்ணப்பங்கள் பெறப்படுகின்றன.

விண்ணப்பப் படிவத்தை தொடர்புடைய விடுதி காப்பாளர் அல்லது காப்பாளினிகளிடம் இருந்து இலவசமாகப் பெற்று, இரு புகைப்படம், வங்கிக் கணக்கு விவரம், பயிலும் பள்ளி, கல்லூரி தலைவரின் ஒப்புதல் பெற்று குறிப்பிடப்பட்ட நாள்களுக்குள், தொடர்புடைய விடுதிக் காப்பாளர், காப்பாளினிகளிடம் நேரில் ஒப்படைக்க வேண்டும். பள்ளி விடுதியில் சேர வரும் 19-ஆம் தேதிக்கு முன்னரும், கல்லூரி விடுதியில் சேர ஜூலை 14-ஆம் தேதிக்கு முன்னரும் விண்ணப்பிக்க வேண்டும். விடுதியில் சேர விரும்பும் மாணவ- மாணவியரின் பெற்றோர் ஆண்டு வருமானம் ரூ.2 லட்சத்துக்குள் இருக்க வேண்டும். மேலும், ஒவ்வொரு விடுதியிலும் 5 இடங்கள் இலங்கை தமிழர்களின் குழந்தைகளுக்காக ஒதுக்கப்படும் எனத் தெரிவிக்கப்பட்டுள்ளது.