சர்வதேச தீர்வுகளுக்கான வங்கியின் துணைத் தலைவராக ரகுராம் ராஜன் தேர்வு

உலகில் உள்ள மத்திய வங்கிகளின் நிதி ஸ்திரத்தன்மையை பாதுகாக்க அனைத்து வங்கிகளுக்கும் வரைமுறை மற்றும் விதிகளை உருவாக்கி வருவது பிஐஎஸ் என அழைக்கப்படும் சர்வதேச தீர்வுகளுக்கான வங்கியாகும் (Bank for International Settlements - BIS).

இந்த வங்கியின் தலைவராக ஜெர்மனியை சேர்ந்த பொருளாதார வல்லுனர் ஜென்ஸ் வெயிட்மேன் இருந்து வருகிறார்.

இந்நிலையில், முக்கியத்துவம் வாய்ந்த இந்த வங்கியின் துணைத்தலைவர் பதவிக்கு இந்திய ரிசர்வ் வங்கியின் ஆளுநர் ரகுராம் ராஜன் நியமிக்கப்பட்டுள்ளார்.

இந்த வங்கியின் துணைத்தலைவராக அவர் 3 ஆண்டுக்கு நியமிக்கப்பட்டுள்ளதாகவும், சுவிட்சர்லாந்தில் நடந்த பிஐஎஸ் இயக்குநர்கள் வாரியக் கூட்டத்தில் இந்த முடிவு எடுக்கப்பட்டதாகவும் ரிசர்வ் வங்கி தனது அறிக்கையில் தெரிவித்துள்ளது.

முதல் முறையாக இந்தியர் ஒருவர் இந்த பதவிக்கு தேர்வு செய்யப்பட்டுள்ளார் என்பதும் குறிப்பிடத்தக்கது.