4 அம்ச கோரிக்கைகளை வலியுறுத்தி பி.எட். கணினி அறிவியல் பட்டதாரி ஆசிரியர்கள் உண்ணாவிரதம்

சென்னை-அரசு பள்ளிகளில் 1-ம் வகுப்பு முதல் 10-ம் வகுப்பு வரை கணினி அறிவியல் பாடத்தை கட்டாய பாடமாக அறிவிக்கவேண்டும், இந்த பாடங்களை நடத்த பி.எட். கணினி அறிவியல் பட்டதாரிகளை ஆசிரியர்களாக நியமிக்கவேண்டும் என்பன உள்பட 4 அம்ச கோரிக்கைகளை வலியுறுத்தி தமிழ்நாடு பி.எட். கணினி அறிவியல் வேலையில்லா பட்டதாரி ஆசிரியர்கள் சங்கம் சார்பில் சென்னை சேப்பாக்கம் அரசு விருந்தினர் மாளிகை அருகே நேற்று கவன ஈர்ப்பு உண்ணாவிரதம் நடைபெற்றது.

உண்ணாவிரதத்துக்கு சங்கத்தின் மாநில செயலாளர் வெ.குமரேசன் தலைமை தாங்கினார். தலைவர் உ.ராமச்சந்திரன் முன்னிலை வகித்தார். உண்ணாவிரதத்தில் ‘பி.எட். கணினி அறிவியல் ஆசிரியர் பட்டதாரிகளின் குடும்பங்களை அரசு காப்பாற்றவேண்டும்’, ‘ சமச்சீர் கல்விக்காக அச்சிடப்பட்ட 6-ம் வகுப்பு முதல் 10-ம் வகுப்பு வரையிலான கணினி அறிவியல் புத்தகங்களை மாணவர்களுக்கு வழங்கவேண்டும்’ என்பன உள்ளிட் பல்வேறு வாசகங்கள் அடங்கிய பதாகைகள் வைத்திருந்தனர். சென்னை, காஞ்சீபுரம், நெல்லை, மதுரை உள்பட தமிழகம் முழுவதிலும் இருந்து ஏராளமான பி.எட். பட்டதாரி கணினி ஆசிரியர்கள் உண்ணாவிரதத்தில் பங்கேற்றனர்.