'அக்னி நட்சத்திர வெயில் வறுத்தெடுக்கும்
நிலையில், அதன் தாக்கத்தில் இருந்து தப்ப, எளிய நடைமுறை போதும்;
தப்புவதும், சிக்குவதும் அவரவர் கையில் தான் உள்ளது' என, அரசு சித்த
மருத்துவர் தெரிவித்துள்ளார். தமிழக அரசு, சித்த மருத்துவர் மணிவண்ணன்
தரும் ஆலோசனைகள்:
* வெயிலின் தாக்கத்தால், உடலில் நீர் சத்தும்,
உப்புச்சத்தும் குறையும்; ரத்த ஓட்டம் சீராக இருக்காது. சத்துக்கள்
குறையாமல் இருக்க, அதிக தண்ணீர் நிறைய குடிக்க வேண்டும்; அது, சுத்தமானதாக
இருக்க வேண்டும்.
* நீர் ஆகாரம், மோர், இளநீர் குடிப்பது நல்லது.
வெள்ளரி, தர்பூசணி நல்லது. நாட்டு வெல்லம் கலந்த, நன்னாரி சர்பத், மாதுளம்
சர்பத், எலுமிச்சை சாறு அடிக்கடி குடிக்கலாம்.
* எலுமிச்சை சாறு தயாரிக்கும் போது, சிறிது
இஞ்சி, நாட்டு வெல்லம் சேர்த்து தயாரித்து, பருகுவது நல்லது. உப்புச்சத்து
மட்டுமின்றி, இரும்புச்சத்தும் கிடைப்பதால், உடலுக்கு நல்லது. இதே
முறையில், கரும்பு சாறும் குடிக்கலாம்.
* வெயில் அதிகமானதால், நீர் சுளுக்கு ஏற்படும்;
சிறுநீர் அதிக மஞ்சள் நிறத்தில் வராமலும், ரத்தம் கலந்து சிவப்பு
நிறத்திலும் வராமல் பார்த்துக் கொள்ள வேண்டும்.
* இரவில், புது பானையில், தண்ணீர் ஊற்றி, யானை
நெருஞ்சி செடியை போட்டு வைத்து, அதிகாலையில் குடித்தால், இந்த நீர்
சுளுக்கு வராது. அலட்சியம் காட்டினால், சிறுநீரில் கல் அடைப்பு ஏற்படும்;
சிறுநீர் பாதிப்பு ஏற்படவும் வாய்ப்புள்ளது.
* இறப்பு ஏன்?: உச்சக்கட்ட வெப்ப தாக்கத்தால்,
மூளை நரம்புகள் வெடித்து விடுவதால் (சன் ஸ்டிரோக்), உயிர் இழப்பு
ஏற்படுகிறது. அக்னி நட்சத்திர காலத்தில் மட்டுமல்ல; கோடையில் பகல்
நேரத்தில், அனைவரும் வெயிலில் செல்வதை முடிந்த அளவு தவிர்க்க வேண்டும்.
வயதானவர்கள், உடல் நலம் குன்றியோர் அறவே வெளியில் செல்லக்கூடாது.
* பணி நிமித்தமாகவோ, அவசரமாகவோ வெளியில் செல்ல
நேர்ந்தால், தொப்பி, குடையுடன் செல்லுங்கள்; பருத்தி உடைகளை மட்டுமே
அணியுங்கள். வெயிலில் நீண்ட நேரம் பயணம் செய்ய வேண்டாம்.
* வெப்ப தாக்கத்தை, எளிதாக எதிர்கொள்ளலாம்;
பாதிப்பின் பிடியில் இருந்து தப்புவதும், சிக்குவதும் அவரவர் கையில் தான்
உள்ளது. இவ்வாறு, அவர் கூறினார்.
0 Comments:
Post a Comment
Dear Reader,
Enter Your Comments Here...