உங்கள் மாணவர்களுக்கு காதலிக்க கற்றுக்கொடுங்கள்! - பாடசாலையின் சிறப்புக்கட்டுரை!

நிகழ்ச்சி 1 - 9 ஆம் வகுப்பு-

மாணவன் 1- வணக்கம் சார். உங்களிடம் ஒரு ரகசியம் சொல்லனும்.

நாம்- சொல்லுப்பா!

மாணவன் 1- அந்த பையன் (மாணவன் 2) 8 ஆம் வகுப்பு படிக்கும் ஒரு பொம்பளை புள்ளைய லவ் பண்றான் சார்.

மாணவன் 2- (அழுதபடியே) இல்ல சார்... அந்த புள்ளை தான் என்னை பார்க்கும் போதெல்லாம் சிரிச்சது சார். அத இவனுங்க தான் லவ்வுன்னு சொல்லிட்டாங்க சார்.

நாம்- தம்பி இதெல்லாம் இந்த வயதில் சகஜம்பா. மனிதன்னா இதெல்லாம் தாண்டி தான் வரனும். அவங்களே அவ சிரிக்கிறா! இவ உன்னை பார்த்து, பார்த்து வெக்கப்படறா! அப்படில்லாம் சொல்லி உசுப்பேத்திட்டு - அவன் தான் உன்னை முதல்ல வாத்தியார்களிடமும், உன் அப்பா அம்மா கிட்டேயும் மாட்டி விட்டு உனக்கு கெட்ட பெயரை ஏற்படுத்துவான். அதனால இதையெல்லாம் பற்றி கவலைப்படாதே! ”இந்த வயதில்-இதெல்லாம் கெட்ட செயல், நான் அத்தகைய கீழ்தரமான செயல்களை செய்யமாட்டேன், நான் நல்லவன்” அப்படின்னு முதல்ல நீ உன்னை பற்றி நம்பு. மற்றது தானாகவே மாறும்.

மாணவன் 2- நீங்க என்னை திட்டுவீங்களோன்னு பயந்துட்டேன் சார்! இனி ”நான் நல்லவன்னு” நான் மட்டும் இல்ல, என் பிரன்ட்சும் நம்புற மாதிரி தான் என் நடவடிக்கை இருக்கும் சார்.

நாம் - வாழ்த்துக்கள் தம்பி.

மேலே நாம் விவரித்தவை ஏதோ நாடக பாணியில் உள்ளதாக கருதவேண்டாம். நடந்தவற்றை மிக சுருக்கமாக இங்கு வழங்கியுள்ளோம்.

பாடசாலையின் வாசக ஆசிரியர்களுக்கு ஒரு வேண்டுகோள்-

          ”பிப்ரவரி 14” அன்று காதலர் தினம் வர இருக்கிறது. இது குறித்து தாங்கள் அறிவீர்களோ, இல்லையோ - தங்கள் மாணவர்கள் அனைவரும் அறிவர். காதல் குறித்த விழிப்புணர்வு இல்லாத மாணவ பருவத்தில் எதிர் பாலின ஆண்கள் கொண்டுவரும் ”விலை உயர்ந்த அலைபேசியோ, சுடிதாரோ அல்லது சாக்லெட்டோ, அன்றைய தினம் அழைத்து செல்லப்படும் சுற்றுலா தளமோ, சினிமா படமோ” - எதற்கும் ஆசைப்பட்டு ஓரிரு வார்த்தைகள் பேசினால் அது அவர்களின் வாழ்க்கையையே மாற்றிவிடும் என உங்கள் வகுப்பு மாணவிகளுக்கு உணர்த்துங்கள்!

            அறியாத வயதில் மாணவிகள் ””தங்களை சுற்றி வரக்கூடிய வேலை வெட்டி இல்லாதவர்களையோ, பரீட்சைகளில் தேர்ச்சி பெறாமல் சும்மா சுற்றுபவர்களையோ பார்த்து ஆசைப்படலாம். மேலும் படித்து ஓரளவு தெளிவு பெற்ற பிறகு ”இது அவசியமற்ற செயல், தங்களுக்கு பொருத்தமானவன் இவன் இல்லை” என உணர்ந்து ஒதுங்கினால் கூட, வயது குறைந்த பெண்களை வசியம் செய்யக்கூடிய இவர்களில் ஒருசிலர் அப்பெண்களுக்கு தொடர்ந்து தொல்லை கொடுப்பர். அப்படியும் தங்களை ஏற்றுக்கொள்ள வில்லை எனில் அவர்களின் வாழ்க்கையை சிதைக்கும் பொருட்டு ”ஆசிட் வீச்சு” சம்பவங்களில் ஈடுபடுகின்றனர்”” - என்பதை சுட்டிக்காட்டவும். இதெற்கெல்லாம் காரணம் அறியாத வயதில் அவசரப்பட்டு அவர்களிடம் ஒரு சில தினங்கள் ஒதுங்கி நின்று பேசியது தான் என்றும், அவர்கள் தரக்கூடிய அல்ப பொருட்களுக்கு ஆசைப்பட்டதும் தான் என அவர்களுக்கு புரிய வையுங்கள்!

ஆசிட் வீச்சால் பாதிக்கப்பட்ட பெண்களின் நிலை-
(இப்படங்களை அவசியம் வகுப்பு மாணவிகளிடம் காட்டவும்)
  

             காதலிப்பது தவறல்ல! ஆனால் அவை தங்களுக்கான குறைந்தபட்ச அடிப்படை தேவைகளை தாங்களே நிறைவேற்றிக்கொள்ளக்கூடிய உரிய வயதில்  அறிவு முதிர்ச்சியுடன் இருக்கும்போது காதலியுங்கள். குழந்தை கர்ப்பத்தில் இருக்கும்போது மல்லாந்து கூட படுக்காமல், ஒருக்களித்தவாறே படுத்து தங்களை பெற்றெடுத்த தாயும், தங்களை மார் மீதும், தோள் மீதும் தூக்கி சுமந்து வளர்த்த தந்தையும் ”நாங்கள் கூட இதைவிட சிறந்த வாழ்க்கை துணையை என் மகளுக்கு(அல்லது) மகனுக்கு பார்த்திருக்க முடியாது. அவ்வளவு பொருத்தமான வரன்” எனும்படி, ஊரார் மெச்சும்படி தங்கள் குணத்திற்கு ஏற்றவரை பொறுமையாக தேர்ந்தெடுத்து, தங்கள் பெற்றோர் சம்மத்துடன் தங்கள் வாழ்க்கை துணையை அமைத்துக்கொள்வதே சிறப்பானது! - என புரிய வையுங்கள்.

                காதலிக்கும் வயதை கடந்து வந்த நம்மை தவிர, வேறு யார் நமது மாணவர்களுக்கு ”காதல்” குறித்து முழுமையான தெளிவை ஏற்படுத்த இயலும். முயற்சிப்போம்!

நன்றி!
அன்புடன் - பாடசாலை.
             

(வாசகர்கள் - இக்கட்டுரை குறித்த தங்கள் கருத்துகளை கீழே உள்ள கமெண்ட் பாக்சில் பதிவிடவும்)