ஒப்பந்த அடிப்படையில் ஆசிரியர்கள் நியமிக்க எதிர்ப்பு: கல்வித்துறை அலுவலகம் முற்றுகை- சாலை மறியல் இந்திய ஜனநாயக வாலிபர் சங்கத்தினர் உள்பட 40 பேர் கைது.
ஓய்வு பெற்ற ஆசிரியர்களை ஒப்பந்த அடிப்படையில் நியமிக்க எதிர்ப்பு தெரிவித்துகல்வித்துறை அலுவலகத்தை முற்றுகையிட்டு போராட்டம்-சாலை மறியல் நடத்திய இந்திய ஜனநாயக வாலிபர் சங்கத்தினர் உள்பட 40 பேரை போலீசார் கைது செய்தனர்.
முற்றுகை போராட்டம்
புதுச்சேரி அரசு கல்வித்துறை சார்பில் அரசு மேல்நிலைப்பள்ளிகளில் காலியாக உள்ள 54 விரிவுரையாளர் பதவிகளுக்கு ஓய்வு பெற்ற ஆசிரியர்களை ஒப்பந்த அடிப்படையில் ரூ.18 ஆயிரம் சம்பளத்துக்கு நியமிக்க உள்ளதாக அறிவிப்பு வெளியானது. இதற்கு பல்வேறு அமைப்புகள் கண்டனம் தெரிவித்தன. மேலும் படித்த வேலையில்லா பட்டதாரி இளைஞர்களுக்கு அந்த பணியை வழங்க வேண்டும் என்றும் வலியுறுத்தி வருகின்றன.இந்த நிலையில், படித்த பட்டதாரி இளைஞர்களுக்கு இந்த பணிகளை வழங்க வேண்டும் என்று வலியுறுத்தி மார்க்சிஸ்ட் கம்யூனிஸ்டு கட்சியின் இந்திய ஜனநாயக வாலிபர்சங்கம், மாதர் சங்கம் மற்றும் மாணவர் சங்கம் சார்பில் நேற்று காலை கல்வித்துறை அலுவலத்தை முற்றுகையிட்டு போராட்டம் நடந்தது.இந்த போராட்டத்திற்கு சங்க செயலாளர்கள் சரவணன், சந்திரா, ஆனந்த் ஆகியோர் தலைமைதாங்கினர். போராட்டத்தில் சங்க நிர்வாகிகள் ரஞ்சித், தட்சிணாமூர்த்தி உள்பட பலர் கலந்து கொண்டனர்.
சாலை மறியல்
இந்த போராட்டத்தில் ஈடுபட்டவர்கள் கல்வித்துறை அலுவலகத்திற்கு உள்ளே நுழைந்துவிடாமல் இருக்க கல்வித்துறை அலுவலக நுழைவு வாயிலை போலீசார் பூட்டி இருந்தனர்.அப்போது போராட்டத்தில் ஈடுபட்டவர்கள் போலீசாரின் தடுப்பை மீறி அலுவலகத்தின் உள்ளே நுழைய முயற்சி செய்தனர். இதனால் போலீசாருக்கும், போராட்டத்தில் ஈடுபட்டவர்களுக்கும் இடையே தள்ளு-முள்ளு ஏற்பட்டது.இதற்கிடையே போராட்டத்தில் ஈடுபட்டவர்கள் கல்வித்துறை அலுவலகத்திற்கு முன்பு திடீரென சாலை மறியல் போராட்டம் நடத்தினர். அப்போது அங்கு பாதுகாப்பு பணியில் ஈடுபட்ட போலீசார், சாலை மறியல் போராட்டத்தில் ஈடுபட்ட 40 பேரை கைது செய்தனர். பின்னர் அவர்களை சிறிது நேரத்தில் விடுதலை செய்தனர். இதனால் கல்வித்துறை அலுவலகத்தில் சிறிது நேரம் பரபரப்பு ஏற்பட்டது.
0 Comments:
Post a Comment
Dear Reader,
Enter Your Comments Here...