TNTET Special Article: இதுவும் கடந்து போகும்! - பாடசாலையின் சிறப்புக்கட்டுரை!

அன்புள்ள பாடசாலை வாசகர்களே,

       வணக்கம், டெட் தேர்வில் வெற்றி பெற்ற தேர்வர்கள், பாடசாலை வாசகர்கள் அனைவருக்கும் வணக்கம். அவர்களிடம் ஒரு வேண்டுகோள்! உங்கள் ஆர்வத்தையும், அற்பணிப்பையும் பணியில் சேர்ந்த போது இருப்பது போல பணியின் இறுதி கட்டம் வரை தொடர்ந்து செயலில் காட்டுமாறு அன்புடன் கேட்டுக்கொள்கிறோம்.

சாதிக்கப்பிறந்தவர்களுக்கு,

              நான்கு தலைமுறையாக ஆசிரியர் பணி செய்து வந்த குடும்பம், தற்போது என்னால் ஆசிரியர் பணி செய்ய முடியவில்லையே என வருந்திய சகோதரி, 105 மதிப்பெண் பெற்று பழைய வெயிட்டேஜ் முறைப்படி நிச்சயம் பணி கிடைக்கும் என காத்திருந்த நேரத்தில் புதிய வெயிட்டேஜ் மாற்றத்தால் இன்று பணியை இழந்து வருந்திய சகோதரன் என அவர்களின் சோகத்தை இங்கு பட்டியலிட வார்த்தைகள் போதாது.

"எது நடந்ததோ, அது நன்றாகவே நடந்தது.

எது நடக்கிறதோ, அது நன்றாகவே நடக்கிறது.

எது நடக்க இருக்கிறதோ, அதுவும் நன்றாகவே நடக்கும்."

- கீதை உபதேசம்!.

        தோற்பதற்கு ஆயிரம் காரணங்கள் இருக்கலாம். வெற்றி பெறுவதற்கு ஒரே ஒரு காரணம் போதும். - "வெறியுடன் கூடிய விடாமுயற்சி”

        டெட் மட்டுமே வாழ்க்கை அல்ல. அடுத்ததாக டி.என்.பி.எஸ்.சி நடத்தும் குரூப் 4, போன்ற பல தேர்வுகள் நடக்க இருக்கிறது. டெட் பாடப் பகுதிகளை படித்து முடித்த உங்களால் இது போன்ற பல தேர்வுகளும் மிக சுலபம். மிக எளிதில் வெற்றி பெற முடியும். எனவே படியுங்கள். ஆனால் ஒன்று மட்டும் நினைவில் கொள்ளுங்கள். நீங்கள் ஆசிரியராகப் பணி செய்வதற்கு தகுதி அற்றவர்கள் அல்ல. காலமும், சூழ்நிலையும் உங்களுக்கு ஏதுவாக அமையவில்லை என்பதே உண்மை. காலம் வரும். அன்று உங்களுக்கு பொன்மாலை சூட்டப்படும். எனவே அவசியம் அடுத்த டெட் தேர்வுக்கு படியுங்கள். டி.என்.பி.எஸ்.சி தேர்வுகளோ, இதர பணி நியமனமோ உங்கள் அத்தியாவசிய குடும்ப பாரத்தை போக்குவதற்கு ஒரு இடைக்கால நிவாரணியாக இருக்கலாமே தவிர, உங்கள் ஒவ்வொரு உள் மூச்சும் ஆசிரியர் பணியையே சூழ்ந்திருக்க வேண்டும். எங்கு தோற்றதாக அடையாளம் காட்டப்பட்டீர்களோ, அங்கிருந்து தான் தங்களுக்கான வெற்றி பயணத்தை தொடங்க வேண்டும்.

•  அடுத்த டெட் தேர்வு நிச்சயம் உண்டா? - நிச்சயம் உண்டு.

• அடுத்த டெட் தேர்வு எப்போது? - தற்போதைய டெட் தேர்வில் வெற்றி பெற்றவர்களுக்கு பணி நியமனம் சார்ந்த செயல்பாடுகள் நடைபெற்று முடிந்தவுடன் ஓரிரு மாதங்களில் அடுத்த டெட் தேர்வு குறித்த அறிவிப்பை எதிர்பார்க்கலாம். புதிய தேர்வு குறித்த அறிவிப்பு வெளியான 3 மாத இடைவெளியில் டெட் - 2014 தேர்வு நடக்கும்.
• அடுத்த டெட் தேர்வில் வெற்றி பெற்றவர்களுக்கு பணி நியமனம் பெற வாயப்புண்டா? - ஆசிரியர் தகுதித் தேர்வு என்பது நிச்சயம் உண்டு. பணி நியமனம் என்பது அரசின் அவ்வப்போதைய கொள்கை முடிவுகளின் படி நடைபெறும். எனவே அடுத்த டெட் தேர்வில் வெற்றி பெறுபவர்களுக்கும் பணி நியமனம் பெற அதிக வாய்ப்புண்டு.
• தற்போது போல் அல்லாமல் அடுத்த டெட் தேர்வில் பணி இடங்கள் மிக, மிக குறைந்து விடுமோ? - கடந்த டெட் தேர்வில் தாள் 2 - 10,000, தாள் 1 - 8,000 என்றவாறு பணி நியமனம் நடைபெற்றது. தற்போது தாள் 2க்கான பணி நியமன அறிவிப்பில் இதுவரையே ஏறத்தாழ 11,000 இடங்களுக்கான அறிவிப்பு வெளியிடப்பட்டுள்ளது. இது தவிர மேலும் ஆதி திராவிடர், நலத்துறை பள்ளிகள், மாநகராட்சி பள்ளிகள் போன்றவற்றிற்கு காலி பணி இடங்கள் அறிவிக்கப்படும் போது தாள் 2ற்கான பணி நியமனம் எண்ணிக்கை கடந்த டெட் - 2012 ஐக் காட்டிலும் அதிகம். அதே சமயம் தாள் 1 ற்கான பணி இடங்கள் கடந்த வருடம் போல் அல்லாமல் நிச்சயம் குறையும். ஆனால் இது போன்று காலிப்பணியிடங்களின் எண்ணிக்கை அதிகமோ அல்லது குறைவோ அதைப்பற்றி கவலைப்படாமல் படிப்பில் மட்டுமே கவனம் செலுத்துங்கள்!
• அடுத்த டெட் தேர்வில் மேலும் மதிப்பெண் குறைந்து விட்டால்? -தற்போது நடைபெற்ற டெட் தேர்வில் தாங்கள் வெற்றி பெற்றிருந்தால் போதும். அந்த சான்றிதழை கொண்டே அடுத்த 7 வருடங்களில் எத்தனை பணி நியமனம் நடைபெற்றாலும் அவற்றிற்கான சான்றிதழ் சரிபார்ப்பில் கலந்து கொள்ள வாய்ப்பு உண்டு.
• அடுத்த டெட் தேர்வில் மேலும் பல்லாயிரம் தேர்வர்கள் வெற்றி பெற்று போட்டிக்கு வந்துவிட்டால்? - இந்த கேள்விக்கு உங்களிடம் ஒரு மாற்று கேள்வியை கேட்கிறோம். அதிகம் யோசிக்காமல் உடனடியாக பதில் கூறுங்கள். டெட்-2013 தேர்வில் இட ஒதுக்கீடு உடனடியாக, தானாகவே வழங்கப்பட்டதா? - இல்லை. தமிழக அரசு ”தகுதியான ஆசிரியர்கள் மட்டுமே தேவை, எனவே இட ஒதுக்கீடுக்கு இடமில்லை” என்றே பெரும்பாலும் கூறி வந்தது, ஆனால் சூழ்நிலை காரணமாக ”இட ஒதுக்கீடு வழங்கப்படும்” என அறிவித்தது நினைவுக்கு வரலாம். நடந்து முடிந்த தேர்வு நடந்ததாகவே இருக்கலாம். அடுத்த டெட் - 2014 தேர்விலும் இட ஒதுக்கீடு நிச்சயம் இருக்கும். அதே நேரம் வினாத்தாள் மிக, மிக கடினமாக இருக்க வாய்ப்பு உண்டு. எனவே முன் யோசனை உள்ளவர்கள் தற்போதிருந்தே படித்து டெட் மதிப்பெண் வீதத்தை அதிகரிக்க முயல்வார்கள்.
• உண்மையாகவே அடுத்த டெட் வினாத்தாள் மேலும் கடினமாக அமையுமா? - ஆம். இதுவரை நடந்து முடிந்துள்ள மூன்று டெட் தேர்வுகளையும் அலசி ஆராய்ந்தால் ஒவ்வொரு தேர்வும் முந்தைய தேர்வை விட கடினமாகவே அமைந்துள்ளது என உணரலாம். அதுவும் டெட் - 2013 தேர்வில் 11 ஆம் வகுப்பு மற்றும் 12 ஆம் வகுப்பு அறிவியல் பாட கேள்விகள் இடம் பெற்றது நினைவிருக்கலாம். எனவே இப்போதிருந்தே திட்டமிட்டு படிக்க வேண்டும்.
• வெயிட்டேஜ் உயர்த்த என்ன வழி? - முன்னர் படித்த 12 ஆம் வகுப்பு, கல்லூரி வழிக்கல்வி போன்றவற்றில் மதிப்பெண் சதவீதம் அதிகரிக்க செய்ய வாய்ப்பு குறைவு என்பதால், தற்போது நடைபெற இருக்கும் டெட் தேர்வில் மிக, மிக அதிகபட்ச மதிப்பெண் பெற திட்டமிட்டு முயற்சிக்க வேண்டும்.
• தற்போது நடைபெற்ற டெட் தேர்விற்கே பணி நியமனம் நடைபெறவில்லை, இதில் அடுத்த டெட் தேர்விற்கு படிப்பதா? - நிச்சயம் படிக்கத்தான் வேண்டும். ஆயுள் முழுவதும் படித்துக்கொண்டே இருப்பது தான் ஆசிரியர் பணி. அத்தகைய ஆசிரியர் பணியினை அடைய மீண்டும் படிப்பது ஒன்றும் தவறில்லை. அடுத்த டெட் தேர்வில் 100 காலிப்பணியிடங்கள் மட்டுமே தான் நிரப்பப்படும் என அரசு அறிவிப்பதாக வைத்துக்கொள்வோம். நீங்கள் அடுத்த டெட் தேர்விற்கு சும்மாவாவது விண்ணப்பிப்பீர்களா? இல்லையா? விண்ணப்பிக்கத்தான் போகிறோம் என முடிவெடுத்து விட்ட பின் 100 என்ன 10,000 என்ன. நாம் திட்டமிட்டு முயற்சி செய்தால் 10ல் ஒருவராக கூட வர முடியும். திட்டமிடுங்கள்! எதிர்மறை எண்ணங்களை விதைப்பவர்களை தவிர்த்து, நேர்மறை எண்ணம் கொண்டவர்களுடன் அதிகம் பழகுங்கள்.
• அடுத்த டெட் தேர்விற்கு எவ்வாறு திட்டமிட்டு படிப்பது? - மூன்று திட்டங்கள் உள்ளது. 1) 150 நாட்களில் டெட் தேர்வை சந்திப்பதாக இருந்தால் அனைத்து பாடப்பகுதிகளையும் எவ்வாறு பிரித்து, படிக்க வேண்டும் என கால அட்டவனை தயார் செய்து கொள்ள வேண்டும். 2) 100 நாளில் எவ்வாறு படிக்கலாம்? 3) 50 நாளில் எவ்வாறு படிக்கலாம்? - இவ்வாறு மூன்று வகையாக பாடப்பகுதிகளை பிரித்து திட்டமிட்டுக்கொள்ளுங்கள். தங்களுக்கு பிடித்தமான அட்டவனைப்படி படித்து வாருங்கள். அவ்வப்போது சுய தேர்வும், நண்பர்களுடன் சேர்ந்தும், பல்வேறு மாதிரித் தேர்வுகளை எழுதி வாருங்கள். அவை உங்களுக்கு மேலும் எவ்வாறு ஆழ்ந்து படிக்க வேண்டும் என்பதை உணர்த்தும். ஆசிரியர் தகுதித் தேர்வில் படிப்பது போன்று அதே அளவு தெளிவாக பணியில் சேர்ந்து விட்ட பிறகும் அனைத்து பாடங்களையும் படிக்கத்தான் போகிறீர்களா? இல்லையே தாங்கள் எந்த வகுப்பு பாடங்களை நடத்த இருக்கிறீர்களோ, அதை மட்டும் தானே அதிக ஈர்ப்புடன் படிக்கப்போகிறீர்கள். மற்றைய பாடங்கள் காலப்போக்கில் தானாகவே நினைவில் இருந்து மறைவது இயல்பு தானே. இறக்கும் நாள் தெரிந்து விட்ட ஒருவன் எவ்வாறு ஒவ்வொரு நொடியையும் ரசித்து வாழ்வானோ, அது போன்று தாங்கள் படிக்கும் பாடங்களையும் ஒவ்வொரு புத்தக்தையும், ஒவ்வொரு பக்கத்தையும், அதில் உள்ள ஒவ்வொரு செய்தியையும் மனப்பாடம் செய்யாமல் ரசித்து படியுங்கள். தொடர்ந்து படிப்பது மட்டும் தான் நமது பணி. உரிய நேரத்தில் உங்களுக்கான அங்கீகாரத்தை ஏற்படுத்தி தருவது இறைவனின் சித்தம். உங்கள் வேலையை நீங்கள் பாருங்கள். இறைவன் வேலையை இறைவன் பார்த்துக்கொள்ளட்டும். தாயும் இறைவனும் ஒன்று, நம்மை குறித்து நல்லதை மட்டுமே நினைப்பார்கள். நல்லது மட்டுமே நடக்கும்.

இத்துடன் நமது கட்டுரை நிறைவு பெறுகிறது.

(பின் குறிப்பு - பள்ளியில் படிக்கும் மாணவன் முதல் ஓய்வு பெற்ற ஆசிரியர்கள் வரை பலரும் தற்போது இணையத்தில் இணைந்துள்னர். கல்வித்துறை மட்டும் என்று இல்லாமல் பல்வேறு துறைகளை சார்ந்தவர்களும் தற்போது இணையத்தை தினந்தோறும் பார்வையிட்டு வருகின்றனர். மதுபானக்கடை அருகே இருவருக்குள் நடைபெறும் கருத்து மோதலை சுற்றி நின்று 100 பேர் பார்ப்பதும், அவ்வப்போது ஏதேனும் ஒரு பக்கம் சேர்ந்து கொண்டு, தாங்களும் அந்த மோதலில் இணைந்து கொள்வதை போல, கல்வி சார் வலைதளங்களை பயன்படுத்தாமல் ஆக்கப்பூர்வமாக பயன்படுத்தலாமே? பல்வேறு பயனுள்ள புதுமையான முயற்சிகளை செய்து வரும் நமது பாடசாலை வலைதளம், அடுத்த டெட் தேர்வினை எழுத இருக்கும் தேர்வர்களுக்கு உதவும் வகையில் ஓர் புதிய முயற்சியில் ஈடுபட இருக்கிறோம். தினந்தோறும் டெட் பாடப்பகுதியிலிருந்து ஒரு கேள்வி கேட்கப்படும். வாசகர்கள் அதற்கான விடை?, அவை எந்த வகுப்பு பாடப்புத்தகத்தில்?, எந்த பக்கத்தில்? அடங்கியுள்ளது என கமெண்ட் பாக்சில் பதில் அளிக்க வேண்டும். அதன் தொடர்ச்சியாக வாசகர்களும் இதே போன்று தங்களுக்கு தெரிந்த கடினமான கேள்விகளை கேட்டு, மற்ற வாசகர்கள் பதிலளிக்க உற்சாகப்படுத்தலாம். இவற்றின் மூலமாக நம் பாடசாலை வாசகர்களை பாடப்பகுதி பற்றி மட்டுமே சிந்திக்க வைத்து, வெற்றியை நோக்கி, ஒரே நேர் கோட்டில் பயணிக்க வைக்க இயலும் என கருதுகிறோம். விரைவில் இப்புதிய முயற்சியை துவக்க உள்ளோம். இது குறித்து தங்கள் கருத்து என்ன? நமது புதிய முயற்சியில் மேலும் ஏதேனும் மாற்றம் செய்ய வேண்டுமா? தங்கள் கருத்தை பதிவு செய்யவும். ஆக்கப்பூர்வமாக பயன்படுத்துவோமே வலைதளத்தை. இணைந்திடுங்கள் பாடசாலையோடு.

நன்றி!
என்றும் அன்புடன் - பாடசாலை.