மாநிலம் முழுவதும் இலவச பயிற்சி: மனித நேயம் கல்வியகம் முடிவு

        தமிழ்நாடு அரசு பணியாளர் தேர்வாணையம் நடத்தும் குரூப் 2 முதல்நிலை தேர்விற்கு மாநிலம் முழுவதும் இலவச பயிற்சி அளிக்க மனித நேயம் கட்டணமில்லா கல்வியகம் முடிவு செய்துள்ளது.

        சென்னை மனித நேய அறக்கட்டளை, மத்திய அரசு தேர்வாணையம் மற்றும் தமிழ்நாடு அரசுப்பணியாளர் தேர்வாணையம் நடத்தும் தேர்வுகளுக்கு இலவச பயிற்சி அளித்து வருகிறது. அனைத்து மாவட்டங்களை சேர்ந்தவர்களும் பயன்பெறும் வகையில் மாநிலம் முழுவதும் இலவச பயிற்சி வகுப்புகளை நடத்த மனித நேயம் கட்டணமில்லா கல்வியகம் முடிவு செய்துள்ளது.

         இந்த ஆண்டு குரூப் 2 தேர்வுக்கும், 2014 ம் ஆண்டிற்கான குரூப் 1 தேர்வுக்கும் பயிற்சி அளிக்கப்பட உள்ளது. பொறியியல் கல்லூரிகளில் 4 ம் ஆண்டு பயிலும் மாணவ, மாணவிகள், கலைக்கல்லூரிகளில் 3 ம் ஆண்டு பயிலுபவர்கள் அடிப்படை பயிற்சியில் கலந்து கொள்ளலாம்.

        முதல் கட்ட பயிற்சி திண்டுக்கல் நத்தத்தில் உள்ள என்.பி.ஆர்., இன்ஜினியரிங் கல்லூரியில் அக். 13 (நாளை)காலை 9.30 க்கு நடைபெற உள்ளது. மதுரை, திண்டுக்கல்லில் இருந்து இலவச பஸ் வசதி மற்றும் பயிற்சியின்போது மதிய உணவிற்கு ஏற்பாடு செய்யப்பட்டுள்ளது.

          திண்டுக்கல் பஸ் ஸ்டாண்ட்டிலிருந்து காலை 7.30 மணிக்கும், மதுரை மாட்டுத்தாவணி, பெரியார் பேருந்து நிலையங்களில் இருந்து காலை 7 மணிக்கும் இலவச பஸ்கள் புறப்படும் என ஒருங்கிணைப்பாளர் சாம்ராஜேஸ்வரன் தெரிவித்தார்.