வாய்ப்புகளை மாணவர்கள் பயன்படுத்தி கொள்ள வேண்டும்

          "வாழ்க்கைத்தரம் உயர வாய்ப்புக் கிடைக்கும் போது அதை மாணவர்கள்பயன்படுத்திக்கொள்ள வேண்டும்," என பாரதியார் பல்கலை துணைவேந்தர் ஜேம்ஸ் பிச்சை கூறினார்.

          வால்பாறை அரசு கலை மற்றும் அறிவியல் கல்லூரியில் இளங்கலை மற்றும் முதுகலை பட்டப்படிப்பு படித்த 232 மாணவ, மாணவியருக்கு பட்டமளிப்பு விழா கல்லூரி வளாகத்தில் நடந்தது. விழாவில், பாரதியார் பல்கலை துணைவேந்தர் ஜேம்ஸ்பிச்சை பேசியதாவது:

           "வாழ்க்கையில் முன்னேற வேண்டும் என்ற குறிக்கோளுடன் மாணவர்கள் நன்றாக படிக்க வேண்டும். அமைதியான சூழலில் படிக்கும் வால்பாறை மலைப்பகுதி மாணவர்களுக்காக தமிழக அரசு இங்கு கல்லூரி துவங்கியுள்ளது.

          பெற்றோர்கள் படும் கஷ்டத்தை உணர்ந்து மாணவர்கள் படித்து வாழ்க்கையில் முன்னேற வேண்டும். விதைத்த விதைகள் ஒரு போதும் உறங்கக்கூடாது. மாணவர்களும் கல்வி என்னும் அறிவை பயன்படுத்தி உயர் பதவிகளை அடைய வேண்டும்.

           தரித்திரத்தில் வாழ்ந்தாலும், சரித்திரம் படைக்க வேண்டும் என்ற நோக்கத்தில் அழியாத செல்வமான கல்வியை கற்க வேண்டும். மாணவர்களின் வாழ்க்கைத்தரம் உயர வாய்ப்புக்கிடைக்கும் போது அதை பயன்படுத்திக்கொள்ள வேண்டும்". இவ்வாறு துணைவேந்தர் பேசினார்.