ஐ.டி.ஐ.,க்களில் பயோ மெட்ரிக் முறை: அமைச்சர் தகவல்

              "ஐ.டி.ஐ.,க்களில், ஆசிரியர், மாணவர் வருகையை முறைப்படுத்த, "பயோ மெட்ரிக்" வருகைப் பதிவு முறை, வரும் கல்வி ஆண்டில் இருந்து அமல்படுத்தப்படும்" என, தொழிலாளர் நலத்துறை அமைச்சர் செல்லபாண்டியன் அறிவித்தார்.

           சட்டசபையில், அவர் வெளியிட்ட சில அறிவிப்புகள்: ஐ.டி.ஐ.,க்களில், ஆசிரியர்களும், மாணவர்களும், சரியான நேரத்திற்கு வந்து, வகுப்புகளில் பங்கேற்பதை முறைப்படுத்தும் வகையில், வரும் கல்வி ஆண்டு முதல், 50 லட்சம் ரூபாய் செலவில், அனைத்து ஐ.டி.ஐ.,க்களிலும், "பயோ மெட்ரிக்" (விரல் ரேகை பதிவு) வருகை பதிவு முறை அமல்படுத்தப்படும்.

              29 ஐ.டி.ஐ., விடுதிகள், எட்டு கோடி ரூபாய் செலவில், புதுப்பித்து, உணவு வசதியும் ஏற்படுத்தி தரப்படும். திருவாரூர், வால்பாறை, பெலகொண்டபள்ளி, சூளகிரி, அவினாசிபாளையம் ஆகிய, ஐந்து இடங்களில், தொழிலாளர் அரசு ஈட்டுறுதி (ஈ.எஸ்.ஐ.,) மருந்தகங்கள் துவங்கப்படும். இதன்மூலம், 18 ஆயிரத்து, 30 தொழிலாளர்கள் பயன் பெறுவர். இவ்வாறு அமைச்சர் அறிவித்தார்.