கருகும் தாவரம் - தாவரவியல் பட்டதாரிகளின் கண்ணீர் கதை.

"கருகும் தாவரம்"

- தாவரவியல் பட்டதாரிகளின் கண்ணீர் கதை.

       முதுகலை தாவரவியல் பட்டதாரிகளின் பணிநியமனம் கிடப்பில் போடப்பட்டுள்ளதால் தாவரவியல் பட்டதாரிகள் கண்ணீர் சிந்தி வருகின்றனர்.

இவர்களின் கண்ணீர் கதை பற்றி சற்று விரிவாக பார்ப்போம்.

         கல்லூாரியில் சேரும் போதே பி.ஏ போன்ற மற்ற பட்டங்களை விட பி.எஸ்.சி போன்ற பட்டங்களில் சேர கடும் போட்டி அதிகம். மேலும் படிப்பு கட்டணமும் அதிகம். மூன்று வருடங்கள் முடிக்கும் போது அரியர் இல்லாமல் தேர்ச்சி பெற்று வருவதே மிகவும் கடினம். அதிலும் 80 சதவீதத்திற்கு மேல் இருந்தால் தான் அரசு பி.எட். கல்லூரிகளில் சேர வாய்ப்பு கிடைக்கும். இல்லையேல் தனியார் பி.எட் கல்லூரிகளில் சேர கட்டணமும் அதிகம், நன்கொடை வேறு.

         இவ்வாறெல்லாம் மிகவும் கடினப்பட்டு பயின்ற பிறகு இவர்களுக்கு கல்வி துறையில் எவ்வாறு பணி வாய்ப்பு கிடைக்கும் என்பதை இப்போது காண்போம்.

            அனைத்து பாடங்களுக்கும் முறையே 600 பணியிடங்கள் தோராயமாக ஒதுக்கப்படுகிறது என வைத்துக்கொள்வோம். இளங்கலை தமிழ் பட்டம் படித்தவர்கள் மட்டுமே 600 தமிழ் பட்டதாரி பணியிடங்களுக்கு போட்டியிடுவர். இதே போல் ஆங்கிலம், கணிதம் போன்ற பாடங்களையும் கூறலாம்.

             ஆனால் அறிவியல் பட்டதாரி ஆசிரியர் பணியிடம் 600 எனில் தோராயமாக அது கீழ்கண்டவாறு பிரிக்கப்படும். 

இயற்பியல் படித்தவர்களுக்கு 200 பணியிடம்.

வேதியியல் படித்தவர்களுக்கு 200 பணியிடம்.

உயிரியல் படித்தவர்களுக்கு 200 பணியிடம். 

      இதில் உயிரியல் பணியிடம் என்பது தாவரவியல் பட்டதாரிகளுக்கு 100 பணியிடம், விலங்கியல் பட்டதாரிகளுக்கு 100 பணியிடம் என பிரித்து வழங்கப்படுகிறது.

             மேலும் நடுநிலைப்பள்ளிகளில் பணியிடம் உருவாக்கப்படும் போதும் பாட சுழற்சி முறையின் அடிப்படையில் முதலில் கணிதம், பிறகு ஆங்கிலம், பிறகு அறிவியல் என்றவாறே உருவாக்கப்படுகிறது. இவ்வாறு பணியிடம் உருவாக்கப்படும் போதும் சரி பிறகு அந்த பணியிடம் பாடவாரியாக பிரிக்கப்படும் போதும் மற்றவர்களைக் காட்டிலும் இவர்களுக்கு போட்டி அதிகம்.

              இவ்வாறு கடின போட்டி நிலவுகையில் ஆசிரியர் தேர்வு வாரியம் மூலம் நடத்தப்படும் தேர்வில் வெற்றி பெற்றும் தற்போது வரை பணிநியமனம் தள்ளி போவதால் தாவரவியல் முதுகலை பட்டதாரிகள் மிகவும் வருத்தமான மனநிலையில் உள்ளனர்.

            இவர்களின் பணிநியமனம் தள்ளி போவதினால் இவர்கள் மிகவும் மன வேதனை அடைந்துள்ளனர்.

              இவர்களுடன் தேர்வு எழுதி வெற்றி பெற்ற அனைத்து பாட முதுகலை ஆசிரியர்களும் ஜனவரி மாதமே பணியில் சேர்ந்து விட்டனர்.

• இவர்கள் ஜனவரி மாதம் முதலே பணிபுரிந்து வருவதால் பணியிலும் பதவி உயர்வு பெறுவதிலும் சீனியிராகி விட்டார்கள்.
• மேலும் இவர்களுக்கு ஜனவரி மாதமே ஒவ்வொரு வருடமும் ஆண்டு ஊதிய உயர்வு கிடைக்கும்.
• தாவரவியல் பட்டதாரிகளுக்கோ மார்சு 31க்குள் பணியில் சேர்ந்தால் மட்டுமே 1ஃ1 ல் ஆண்டு ஊதிய உயர்வு கிடைக்கும். இல்லையேல் 1-4 எனப்படும் ஏப்ரல் மாதமே ஆண்டு ஊதிய உயர்வு மாதமாக நிர்ணயிக்கப்படும்.
• பணி கிடைக்கும் வரை தனியார் பள்ளியிலாவது பணிபுரிந்து குடும்பத்தை காப்பாற்றலாம் என்று நினைத்தால், தனியார் பள்ளிகள் 1 வருட அக்ரிமண்ட் கேட்கிறார்கள்.
• மற்ற பாடங்களில் வெயிட்டிங் லிஸ்ட்டில் உள்ளவர்கள் கூட கலந்தாய்வில் பங்கேற்று பணிநியமன ஆணை பெற்றுள்ள நிலையில் இவர்கள் மட்டும் என்று பணியில் சேருவோம் என தெரியாமல் ஏங்குகிறார்கள்.

உண்மை நிலவரம்.

         கல்வித் துறை ஏப்ரல் மாதங்களில் ஆசிரியர் பணிநியமனம் செய்ய வாய்ப்பு மிகவும் குறைவு.

               காரணம் ஏப்ரல் மாதங்களில் தேர்வு சமயம் என்பதால் புதியதாக பாடம் நடத்த ஆசிரியர்கள் தேவையில்லை என்பதாலும், மே மாதங்களில் பள்ளி விடுமுறை என்பதாலும் ஜுன் மாதமே பணிநியமனம் கிடைக்க வாய்ப்பு இருப்பதாக நாம் கருதுகிறோம்.

                 இது ஒரு எதிர்பார்க்கப்படும் செயலே தவிர நிரந்தரம் இல்லை. அரசும், கல்வித்துறையும் நினைத்தால் நீதிமன்ற வழக்குளையும், இதர பிரச்சினைகளையும் சிறப்பு கவனம் எடுத்து உடனடியாக முடித்து, இப்போதே கூட பணி நியமனம் செய்யலாம்.

ஆனால் அதற்கு தேவை ஒன்று மட்டும் தான். உங்கள் ஒற்றுமை.

செய்ய வேண்டியது என்ன ?

            தேர்வு பெற்றவர்கள் தங்கள் வசிப்பிடத்தில் உள்ள சட்டமன்ற உறுப்பினரை சந்தித்து உங்கள் சார்பாக சட்டமன்ற கூட்டத்தின் போது அரசின் கவனத்தை ஈர்க்க செய்யலாம்.

           உள்ளுரில் உள்ள மீடியாக்கள் மூலமாக உங்கள் மனவேதனையை தொடர்ந்து எடுத்துரைக்கலாம்.

         பல்வேறு வழக்குகள் மற்றும் சிக்கல்கள் இருந்தும், ஆசிரியர் தகுதித் தேர்வில் வெற்றி பெற்றவர்களின் பெயரை வெள்ளி மாலை 7.30 மணிக்கு வெளியிட்டு ஞாயிறு காலை கலந்தாய்வு நடத்தி, திறம்பட பணி நியமனம் வழங்கியவர்கள் நம் கல்வி துறையும், தமிழக அரசும்.

             இலங்கை தமிழர்கள் விஷயத்தில் தாய்மை உள்ளத்தோடு தெளிவாகவும், அதிரடியாகவும் முடிவுகளை எடுக்கும் நம் தமிழக முதல்வர் நிச்சயம் உங்கள் பிரச்சினையையும் தீர்த்து வைப்பார்.

                  அதற்கு தேவையெல்லாம் உங்கள் ஒற்றுமையும், சாத்வீகமான முறையில் தமிழக முதலமைச்சரின் கவனத்தை ஈர்ப்பதும் மட்டும் தான்.

ஒன்று படுங்கள். வெற்றி பெறுங்கள்!. 

விரைவில் பணிநியமன ஆணை பெற்று பணியில் சேர வாழ்த்துக்கள்.

-    அன்புடன் பாடசாலை.